බිබිල මූලික රෝහලේ දැඩි සත්කාර ඒකකය සඳහා වසර 10ට පෙර ගෙනා වෛද්‍ය උපකරණ ගබඩාවක ගොඩ ගසා තිබීම පිළිබඳව ලංකාදීප වෙබ් අඩවියෙන් තොරතුරු අනාවරණය කිරීමෙන් පසු රාජ්‍ය ඇමති විජිත බේරුගොඩ මහතා අද(20) රෝහලේ නිරීක්ෂණ චාරිකාවක නිරත වූයේය.

ඒ පිළිබඳව සොයා බැලීම සඳහා රෝහලට පැමිණි ඇමති විජිත බේරුගොඩ මහතා මෙසේ ද පැවසීය.

“බිබිල මූලික රෝහලට 2010 වසරේදි ගෙනා දැඩි සත්කාර ඒකකය සඳහා අවශ්‍ය සියලුම උපකරණ තවමත් ප්‍රයෝජනයකට නොගෙන තිබෙන බව ලංකාදීප වෙබ් අඩවිය වාර්තා කර තිබෙනු අප දුටුවා.මේ උපකරණ ප්‍රයෝජනයට නොගෙන ඇත්තේ වෛද්‍යවරුන්ගේ හිඟය නිසා වෙන්න ඇති. කෙසේවෙතත් පසුගිය ආණ්ඩුවෙන් මේ රෝහල ගැන බලලා නෑ. අඩුපාඩු රැසක් තිබෙන බව මට පෙනුනා.

මම සෞඛ්‍ය ඇමැතිනී පවිත්‍රා වන්නිආරච්චි මහත්මියට කතා කළා. ඇය ජනවාරි 31ට කලින් රෝහලේ සිටින වෛද්‍යවරුන් හා සෞඛ්‍ය බලධාරීන් සමග සාකච්ජාවක් පවත්වා රෝහලට අවශ්‍ය සියලු පහසුකම් ලබාදීමට කටයුතු කරන බව පැවසුවා” යැයි විජිත බේරුගොඩ මහතා පැවසීය.
lankadeepa