ඉදිරි මැතිවරණයේදී අපිව මෙහෙයවන්නේ සජිත් ප්‍රේමදාසයි

වෙළඳපලේ එළවලූ මිල අධික බැවින් වහා එය පාලනයට රජය පියවරක් ගතයුතු යැයි පාර්ලමේන්තුමන්ත්‍රී ලක්ෂ්මන් කිරිඇල්ල මහතා පවසයි.

දුන් පොරොන්දු ඉටුනොකර ආණ්ඩුව හඬ පටයක් අල්ලාගැනීම නිසා අද ආණ්ඩුව මඩ ෆැක්ටරියක් වී ඇතැයි ද මන්ත්‍රීවරයා වැඩිදුරටත් පැවසීය.

මන්ත්‍රීවරයා මේ බව ප්‍රකාශ කළේ දීර්ඝ කාලයක් අතහැර දමා තිබුණු පේරාදෙණිය සතිපොළ පැවති භූමි ප්‍රදේශය ගඟවට කෝරළේ ප්‍රාදේශීය සභා අරමුදල් රුපියල් මිලියන 5.5ක වියදමින් සංවර්ධනය කොට විවෘත කිරිමේ අවස්ථාවට අද (11) එක්වෙමිනි.

අනතුරුව ඒ මහතා සතිපොළෙහි නිරික්ෂණ චාරිකාවකටද එක්විය.

මෙහිදි වැඩිදුරටත් අදහස් දැක්වූ මන්ත්‍රීවරයා,

“දීර්ඝ කාලයක් අතහැර දමා තිබුණ මෙම සතිපොළ නැවත සංවර්ධනය කිරිම පිළිබඳව මා සතුටු වෙනවා. මන්ද ග්‍රාමීය ජනතාව බොහෝ දෙනෙක් මෙම පොළෙන් පහසුකම් සපයා ගත්තා.

සතිපොළ විවෘත කිරිමෙන් පසුව නිරික්ෂණය කිරිමෙන් තේරුනේ අද එළවළු මිල ඉතා අධිකයි. ඉතින් රජය මිල පාලනයක් ඉක්මනින් ඇති කරන්න. මැතිවරණ සමයේ දුන් පොරොන්දු ඉෂ්ඨ කරන්න.

ආණ්ඩුව මේ දවස්වල හඬ පටයක් අල්ලාගෙන දඟලනවා. ආණ්ඩුව මඩ ෆැක්ටරියක් වෙලා. හිරිකිතයි. ධර්මද්වීපයක් හදන්නයි බලයට ආවේ නමුත් අද හඬ පටයක් අල්ලාගෙන රූපවාහිනි මාධ්‍ය සියල්ලම යොදාගෙන අසභ්‍ය වචන පවා තිබෙන හඬපට ප්‍රචාරය කරනවා. ඒක හරිද ?

පුදුමයට කාරණාවක් නෙමෙයි මන්ද අපේ පක්ෂයේ අයටත් ආරාධනා ලැබී තිබුණා රුවන්වැලි සෑය අබියස දිවුරුම් දීමේ උත්සවයට. රජයේ පළමු උත්සවය පැවැත්වුණෙත් හූ හඬ මධ්‍යයේ. හූ හුඩ මධ්‍යයේ ආරම්භ කළ දේවල් සාර්ථක වන්නේ නැහැ.

මන්ත්‍රීවරයෙක්ගේ වගකීම අපි තේරුම්ගත යුතුයි. මමත් අවුරුදු 31ක් පාර්ලිමේන්තුවේ ඉන්නවා. මන්ත්‍රිවරයෙක් කියන්නේ දුක්ගන්නාරාළ වගේ. මටත් නිතරම දුරකථන ඇමතුම් එනවා වෛද්‍යවරුන්ගෙන්, නීතිඥ මහත්වරුගෙන්, විනිසුරුවරුන්ගෙන්, ජනතාවගෙන්.

ඒ අයට සිදු වූ අසාධාරණකම් ගැන පාර්ලිමේන්තුවේ කථාකරන්නයි ඒ අය අපිට කියන්නේ. මන්ත්‍රීවරයෙක් වුණාම අපි ඒ අයගේ දුක අහලා යම්කිසි සහනයක් දෙන්න කටයුතු කරන්න ඕන.

ඉදිරි මැතිවරණයට විපක්ෂය පුළුල් සන්ධානයකින් ඉදිරිපත් වෙනවා. මැතිවරණට නායකත්වය දෙන්නේ සජිත් ප්‍රේමදාස මැතිතුමා.

එතුමත් සමඟ අත්වැල් බැඳගෙන මේ මැතිවරණය ජයග්‍රහණය කරන්න සියළු දෙනාම සූදානම් වියයුතුයි”