තුන් වෙනි දිනටත් රන්ජන් පාර්ලිමේන්තුවේ නැහැ.මම චිත්‍රපටයක රඟපානවා.රන්ජන් කියයි

පාර්ලිමේන්තු මන්ත්‍රී රන්ජන් රාමනායක මහතාගේ හඬපට සිද්ධිය ගැන කතානායක කරු ජයසූරිය මහතාගේ දැඩි අවධානය යොමු වී ඇතැයි වාර්තා වෙයි.

කතානායකවරයා රන්ජන් රාමනායක මහතාගෙන් ඉදිරියේ දී මේ ගැන කරුණු විමසීමට බලාපොරොත්තුවෙන් සිටින බව පාර්ලිමේන්තු ආරංචිමාර්ගවලින් පැවැසේ.

රන්ජන් රාමනායක මහතාගේ හඬපට සිද්ධියෙන් පාර්ලිමේන්තුවට ද විශාල කැළලක් ඇති වී තිබෙන හෙයින් ඒ කෙරෙහි කතානායකවරයාගේ දැඩි අවධානය මෙසේ යොමු වී ඇතැයි පැවසේ.

කතානායකවරයා කරුණු විමසුවහොත් හඬපට ගැන සියලු තොරතුරු පැවැසීමට තමා සූදානම් යැයි පාර්ලිමේන්තු මන්ත්‍රී රන්ජන් රාමනායක මහතා ‘ලංකාදීප’යට ඊයේ පැවැසීය.

රන්ජන් රාමනායක මහතා තුන්වැනි දිනයටත් ඊයේ මැතිසබයට පැමිණ සිටියේ නැත. ඒ සම්බන්ධයෙන් කළ විමසුමක දී රාමනායක මහතා පැවැසුවේ චිත්‍රපටයක රඟපෑම් කටයුත්තක යෙදී සිටින හෙයින් මැතිසබයට නොපැමිණි බවයි.

හඬපට පිළිබඳ සිද්ධිය සම්බන්ධයෙන් පාර්ලිමේන්තු තේරීම් කාරක සභාවක් පත් කරන්නැයි ආණ්ඩුවේ මන්ත්‍රීවරු පිරිසක් ඉකුත්දා පාර්ලිමේන්තුවේ දී ඉල්ලීමක් කළහ.