අවුරුදු 20 වන විට සෑම තරුණයෙකුටම රැකියාවක් .මගේ ඉලක්කය එයයි – ජනපති කියයි

ජනතාවට අවශ්‍ය වූයේ වැරදි මාවතක ගමන් ගත් රට නිවැරදි කිරීමේ නායකත්වයක් මිස ගෝඨාභය රාජපක්ෂ කෙනෙකු නොවන බව ජනාධිපතිවරයා පවසයි.

එහෙයින් අවශ්‍යතා හඳුනාගනිමින් පොරොන්දු ඉටු කිරීමට හැකි උපරිමයෙන් කැපවන බව ජනාධිපති ගෝඨාභය රාජපක්ෂ මහතා අද(09) පෙරවරුවේ අරලිගහ මන්දිරයේ පැවති ශ්‍රී ලංකා පොදුජන පෙරමුණේ තරුණ සම්මේලනය අමතමින් සඳහන් කළේය.

වැරදි මාවතක ගිය රට නිවැරදි දිසාවට යොමු කරන පරිවර්තනයට දායක වූ තරුණ පරපුරට ජනාධිපතිවරයා කෘතඥතාව පළ කළේය.

තරුණයාගේ මෙන්ම සමස්ත ජනතාවගේ සිතුම් පැතුම් සහ අවශ්‍යතා පිළිබඳ මනා අවබෝධයකින් කටයුතු කිරීමට තම රජය හැකි උපරිමයෙන් ක්‍රියා කරන බව ජනාධිපතිවරයා පැවසීය.

තමා ජනාධිපති ධූරයට පත් කළා සේම සිය ප්‍රතිපත්ති ජනතාව වෙනුවෙන් ඉදිරියට ගෙන යාමට තරුණ සහාය අපේක්ෂා කරන බව ගෝඨාභය රාජපක්ෂ මහතා කියා සිටියේය.

ගත වූ වසර 05ක කාලයේදී රටේ ආර්ථිකය මෙන්ම රාජ්‍ය ආයතන සියල්ලම බිඳ වැටිණ.

ආර්ථිකය ශක්තිමත් කොට ලාබ ලබන ඉහළ කාර්යක්ෂමතාවක් සහිත රාජ්‍ය ආයතන පද්ධතියක් ගොඩනගන බවට එතුමා සහතික විය.

රටේ ඉදිරි ගමන සඳහා සෙසු රටවල් සමඟ එක්ව ක්‍රියා කිරීමට තාක්ෂණය භාවිත කළ යුතුය.

අධ්‍යාපන ක්‍රමය නවීන තාක්ෂණයට සහ තොරතුරු සංනිවේදනයට මුල් තැන දෙමින් වෙනස් කිරීමේ අවශ්‍යතාව පවතී.

එය කඩිනම් කිරීමෙන් තරුණ තරුණියන්ට රැකියා අවස්ථා විශාල ප්‍රමාණයක් බිහි කිරීමට මෙන්ම ඉහළ වේතනයක් ලබා ගැනීමට හැකි බව ජනාධිපතිවරයා පෙන්වා දුන්නේය.

දියුණු රටවල් ආදර්ශයට ගනිමින් වයස අවුරුදු 20ක් වන විට විශ්වවිද්‍යාලයෙන් තරුණයන් රැකියා සඳහා යොමු විය යුතු බව ජනාධිපතිවරයා අවධාරණය කළේය.

විශ්වවිද්‍යාලවලට බඳවා ගැනිමේ දී මෙන්ම නවක වදය හේතුවෙන් සිදුවන හානිය පිටුදැකීමට කාලය එළැඹ ඇති බව ද ජනාධිපතිවරයා පැවසීය.

තොරතුරු තාක්ෂණය දියුණු කිරීමෙන් ක්ෂේත්‍ර ගණනාවක ස්වයං රැකියා අවස්ථා දියුණු කර ගත හැකිය.

සංචාරක, වැවිලි සහ කෘෂි ක්ෂේත්‍ර මගින් රැකියා ප්‍රශ්නයට විසඳුමක් මෙන්ම රටේ ආර්ථිකයට ඉහළ ආදායමක් එක් කළ හැකි බව ජනාධිපතිවරයා පෙන්වා දුන්නේය.

විවිධ අසත්‍ය ප්‍රචාරයන්ට හසුව තම තරුණ කාලය නාස්ති කර නොගන්නැයි ජනාධිපතිවරයා තරුණ පිරිසගෙන් ඉල්ලා සිටියේය.