ගං වතුරට ගසාගෙන ගිය බසයක සිටි 54 දෙනෙකු බේරා ගැනේ

ගංවතුරට ගසාගෙන ගිය බස් රථයක කොටුවීසිටි කුඩාදරුවන්, ගැබිණි මවුවරුන්, කාන්තාවන් ඇතුළු මගීන් 54 දෙනෙකු පොලොන්නරුව ගල්ලෑල්ල ප්‍රදේශයේදී අද(21) අළුයම මුදාගත් බව පොලොන්නරුව පොලීසිය කියයි.

මගීන් රැගත් මෙම බස් රථය මාදුරුඔය සිට කොළඹ බලා ගමන් ගනිමින් සිටියදී පොලොන්නරුව මඩකළපුව ප්‍රධාන මාර්ගයේ මනම්පිටිය සහ ගල්ලෑල්ල අතර ජලයෙන් යටවී තිබූ ප්‍රදේශයේදී ගංවතුරට හසුවී ගසා ගෙනගොස් ඇත.

පොලොන්නරුව මඩකලපුව ප්‍රධාන මාර්ගයේ ගල්ලෑල්ල ප්‍රදේශයේ මේ වනවිට ජල මට්ටමඅඩි 06 ක් පමණ දක්වා ඉහළ නැඟ තිබෙන බව පොලීසිය සඳහන් කලේය.

බස් රථය තුල ගංවතුරට කොටුවී සිටි පිරිස බේරා ගැනීම සඳහා පොලීසිය, යුදහමුදාව, සිවිල්ආරක්‍ෂක බලකාය ඇතුළු සහන කණ්ඩායම් මූලිකව ක්‍රියාකර තිබේ.

මේ අතර පොලොන්නරුව පරාක්‍රම සමුද්‍රයේ වාන්දොරටු 10 න් 08ක් අඩිදෙකක් දක්වා අද(21) විවෘත කළ බව වාරිමාර්ග නිලධාරීහු පැවැසූහ.

Lankadeepa