වැඩි ගණන් දී කුලී රථවල යන ජනතාව වෙනුවෙන් රාත්‍රියට විශේෂ බස් රථ සේවාවක් අරඹයි

බස් රථවලට දවල් කාලයේ අයකරන ගාස්තුවට වඩා යම් ප්‍රමාණයක වැඩි ගාස්තුවක් අය කරන පදනම මත හෝ රාත්‍රී බස් සේවය ආරම්භ කරන බව ප්‍රවාහන සේවා කළමණාකරණ අමාත්‍ය දිලුම් අමුණුගම මහතා කීය.

මහනුවරදී ඊයේ (13) සවස පැවැති මාධ්‍ය හමුවකදී අදහස් දක්වමින් දිලුම් අමුණුගම මහතා එසේ කීය.

‘‘රාත්‍රී කාලයේ ධාවනය වූ බස්සේවාව දැනට ධාවනය නොවීම හේතුවෙන් ජනතවාව දැඩි දුෂ්කරතාවයට මුහුණ දී සිටින බව ඔවුහු නිතර අප සමඟ ප්‍රකාශ කරනවා. රාත්‍රී කාලයේ සේවය හැර නිවෙස්වලට යන බොහෝ දෙනෙකු රුපියල් සිය ගණනක් දී ත්‍රී රෝද රථයකින් තමන්ගේ නිවසට යනවා. මෙය ඔවුන්ට දරා ගත නොහැකි විශාල වියදමක්. ඒ නිසා බස් රථවලට සාමාන්‍යයෙන් දවල් කාලයේ අය කරනු ලබන ගාස්තුවට වඩා වැඩි ගාස්තුවක් අය කර ගැනීමේ පදනම මත හෝ රාත්‍රී කාලයේ බස් සේවාව ඉතා ඉක්මනින් ආරම්භ කිරීමට පියවර ගන්නවා.‘‘ යැයි වැඩිදුරටත් කීය.

ලංකාදීප